გრამატიკა
![IDevice Icon](icon_activity.gif)
სუბიექტურ პირს ზმნის ფორმაში თავისი ნიშანი აქვს, ობიექტურს - თავისი. ანუ,
ზმნის ფორმაში არის ისეთი ელემენტი ან ელემენტები, რომლებიც გვაძლევენ ინფორმაციას
სუბიექტისა და ობიექტების შესახებ.
სუბიექტური პირის ნიშანი პირველ პირში ვ- თავსართია, მრავლობითში ამ ვ-ს ემატება
-თ ბოლოსართი: ვ-აკეთებ - ვ-აკეთებ-თ, ვ-ამზადებ - ვ-ამზადებ-თ, ვ-წერ - ვწერ-თ...
მეორე სუბიექტური პირის ნიშანი თანამედროვე ქართულში პრაქტიკულად ნულია; მრავლობითობას
აქაც -თ გამოხატავს: აკეთებ - აკეთებთ, ამზადებ - ამზადებ-თ, წერ - წერ-თ... ორიოდე
ზმნაში გვაქვს მეორე სუბიექტური პირის ნიშანი ხ- თავსართი: ხ-არ, მო-ხ-ვალ (ეს ძველი
ქართულის გადმონაშთია).
მესამე სუბიექტურ პირს განსხვავებული ნიშანი აქვს მხოლობითსა და მრავლობითში.
ორივე რიცხვში ზმნას დაერთვის ბოლოსართები ანუ სუფიქსები.
მხოლობით რიცხვში გვაქვს: -ს, -ა, -ო: აკეთებ-ს, ამზადებ-ს, წერ-ს... აკეთ-ა,
ამზად-ა, წერ-ა... აანთ-ო, ააგ-ო, შეაქ-ო...
მრავლობითში გვაქვს: -ნ, -ენ, -ან, -ნენ, -ეს: აკეთო-ნ, ამზადო-ნ, წერო-ნ... აკეთებ-ენ, ამზადებ-ენ, წერ-ენ... მღერი-ან, მიდი-ან, ჭრი-ან... აკეთებდ-ნენ, ამზადებდ-ნენ, წერდ-ნენ... აკეთ-ეს, ამზად-ეს, წერ-ეს...
- ჩამოწერეთ 10 სამპირიანი ზმნა.
- ჩამოწერეთ 10 ორპირიანი ზმნა, რომელსაც შეეწყობა
მოქმედი პირი (სუბიექტი) და უმოქმედო პირი - პირდაპირი ობიექტი.
- ჩამოწერეთ 10 ორპირიანი ზმნა, რომელსაც შეეწყობა
მოქმედი პირი (სუბიექტი) და უმოქმედო პირი - ირიბი ობიექტი.