გრამატიკა
![IDevice Icon](icon_activity.gif)
ბრძანებითი კილო მოსაუბრის
სურვილის განხორციელებას გულისხმობს. ეს სურვილი შეიძლება გამოიხატოს არა მარტო ბრძანების,
არამედ თხოვნის, ხვეწნა-მუდარისა და წაქეზების სახითაც, მაგრამ გრამატიკაში ყველას
ბრძანებითი ჰქვია. მოსაუბრე პირველი პირია მხოლობითი რიცხვისა, ამიტომ მისი სურვილის
შემსრულებელი შეიძლება იყოს მე-2 და მე-3 პირი. ე. ი. მოსაუბრე პირმა შეიძლება უბრძანოს
მე-2 და მე-3 პირს, პირველ პირს კი მხოლოდ იმ შემთხვევაში, როდესაც მოსაუბრესთან ერთად
სხვებიც არიან, ანუ, როდესაც ფორმა მრავლობითი რიცხვისაა.
არსებობს წართქმითი და უკუთქმითი
ბრძანებითი.
წართქმითია ფორმა, რომელიც
ზმნით გამოხატული მოქმედების შესრულებას გულისხმობს: მოიტანე! წაიღე! წადი! ააშენე!
გააკეთე! დახატე! გარეცხე! დაწერე!
უკუთქმითია ფორმა, რომელიც
ზმნით აღნიშნული მოქმედების აკრძალვას წარმოადგენს. ამას სხვანაირად აკრძალვითსაც უწოდებენ.
აკრძალვითს თან ყოველთვის თან ახლავს ნუ
ან არ ნაწილაკი:
ნუ აკეთებ! ნუ წერ! ნუ ხატავ!
ნუ რეცხავ! ნუ მიდიხარ! ნუ მიგაქვს!
არ გააკეთო! არ დაწერო! არ
გარეცხო! არ წახვიდე! არ წაიღო!
ბრძანების გამოსახატავად
განსაკუთრებული ფორმა თანამედროვე ქართულს არა აქვს. წართქმითი ბრძანებითის მე-2 პირის
ფორმა ემთხვევა წარსული დროის, ე. წ. წყვეტილის ფორმას; როგორ გავარჩიოთ ისინი ერთმანეთისგან?
- თუ ზმნას აქვს წარსულის გაგება, ის წყვეტილის ფორმაა; თუ ზმნას მომავალი დროის გაგება
აქვს, მაშინ ის ბრძანებითის ფორმაა.
ნუ ნაწილაკიანი ბრძანებითი
ახლანდელი (აწმყოს) ან მომავალი დროის (მყოფადის) ფორმებთან გვხვდება: აკეთებ - ნუ
აკეთებ! ნუ გააკეთებ! ხატავ - ნუ ხატავ! ნუ დახატავ! წერ - ნუ წერ! ნუ დაწერ!
არ ნაწილაკი კავშირებითის ფორმებთან გვხდება: არ გააკეთო! არ დახატო! არ დაწერო!
შეასრულეთ წერითი სავარჯიშო P127/1
შეასრულეთ წერითი სავარჯიშო P127/2