გრამატიკა
სიტყვას, რომელსაც სახელის
ნიშნებიც აქვს და ზმნისაც, სახელზმნა ჰქვია.
საწყისი ნაზმნარი სიტყვაა.
წინადადებაში იგი გამოყენებულია, როგორც არსებითი სახელი: შეიძლება იყოს ქვემდებარე,
დამატება ან სხვა წევრი; მაგ.: „მთელი დღე მუშაობამ დამღალა“ („მუშაობამ“ ქვემდებარეა);
„მუშაობას შეუდგა“ („მუშაობას“ დამატებაა). ამ ნიშნის გამო მას მოქმედების სახელიც
ჰქვია.
საწყისის ნიშანია სუფიქსი
-ა, რომელიც დაერთვის აწმყოს ან მყოფადის ფუძეს: წერ-ს - წერა, ჭამ-ა, მუშაობ-ა, ხატვ-ა...
გათბობ-ა, აშენებ-ა, გაკეთებ-ა...
ზმნის ნიშანთაგან საწყისს
შეიძლება ჰქონდეს ასპექტი და კონტაქტი.
კეთებ-ა უსრული ასპექტის
ფორმაა, გაკეთებ-ა, შეკეთებ-ა, გადაკეთებ-ა - სრული ასპექტისა.
გაკეთება უშუალო კონტაქტის
ფორმაა, გაკეთებინება კი - შუალობითისა.
საწყისი ბრუნებადი სიტყვაა.
ა-თი ნაწარმოები საწყისი ფუძეკვეცადია: ხატვა, ხატვა-ს,
ხატვ-ის, ხატვ-ით, ხატვა-დ. მრავლობითი რიცხვი, ჩვეულებრივ, არა აქვს, მაგრამ არსებით
სახელად ქცეულ საწყისს მრავლობითიც ეწარმოება: სხდომა - სხდომები, კითხვა - კითხვები...
საწყისში, ჩვეულებრივ,
ჩანს თემის ნიშანი (-ებ, -ობ: აკეთ-ებ-ს - კეთ-ებ-ა... მუშა-ობ-ს - მუშა-ობ-ა...
-ავ თემისნიშნიანი ზმნების საწყისში თემისნიშნისეული
-ა იკარგება: ხატავს - ხატვ-ა, მალავს - მალვ-ა, რეცხავს - რეცხვ-ა...
საწყისში ჩანს ასევე -ევ და -ენ ელემენტები, რომელიც ზმნის პირიან ფორმას შეიძლება ჰქონდეს: ანგრ-ევ-ს - დანგრ-ევ-ა... ადგ-ენ-ს - დადგ-ენ-ა...
შეასრულეთ წერითი სავარჯიშო P 132/1
შეასრულეთ წერითი სავარჯიშო P 132/2
დაწერეთ შვიდი წინადადება, სადაც წარმოდგენილი იქნება
საწყისები.